کاڵێ

شه‌خته‌ لێیداوه‌ شێعر

شه‌خته‌ لێیداوه‌ شێعر، بێ نه‌شه‌یه‌ لێوی گه‌لیش
تا به‌هار دێ دڵی من که‌یله‌ له‌ بێستان و مه‌لیش

نیه‌ بولبول به‌ چریکه‌ی گه‌شه‌ کا باخ و وڵات
داخه‌که‌م مه‌سکه‌نی قاڵاو و ده‌ڵه‌ و لانی قه‌لیش

ده‌شت و مه‌زرا پڕی که‌متیار و به‌راز و گورگه‌!
هیچ هومێدێک نیه‌ تازه‌! ببێ خه‌رمان و خه‌لیش

گه‌لێ په‌ڕ په‌ڕ بوو هه‌ڵاڵه‌ و گوڵی ئه‌م ده‌شت و که‌ژه‌
له‌و به‌هاره‌ی دا، خه‌زان، کاتی نه‌بوو بۆ ئه‌جه‌لیش

هێنده‌ بیستم له‌ شێعر بۆنی ڕیا و ماته‌م و خه‌م!
ڕقم هه‌ستا له‌ قه‌ڵه‌م،هه‌م له‌ قه‌سیده‌ و غه‌زه‌لیش

قه‌ڵه‌مێ به‌رزه‌ سه‌ری، خاوه‌نی پاک بێت و بوێر
خۆ ده‌نا ئه‌و قه‌ڵه‌مه‌ ده‌چته‌ ده‌سی زۆر ده‌غه‌ڵیش

هێنده‌ گه‌ستم له‌ ڕقان لێو و زمانم که‌ خوێن
هه‌م ڕدێن و چه‌نه‌گه‌ی گرتووه‌ هه‌م چنگ و په‌لیش

ئێسته‌ مه‌یدانی سیاسه‌ت بیر و زه‌ینی گه‌ره‌که‌
ڕه‌نگه‌ پێی وابێ که‌حێله‌، گوێدرێژێکی شه‌لیش

زاڵمی خاک و وه‌ته‌ن وه‌ک بوته‌ ‎لای خه‌ڵک و ته‌ره‌س
جێی خودای گرتووه‌ ناکه‌س، بۆته‌ هانا و هوبه‌لیش

ڕوونه‌ ئایه‌نده‌،سبه‌ی شادییه‌، سه‌ربه‌ستییه‌! گه‌ر
ڕاپه‌ڕێ ئه‌م گه‌له‌ بگرێته‌وه‌ کوێستان و که‌لیش

ئه‌و خه‌مه‌ من ده‌کوژێ خێڵی قه‌ڵه‌م  زۆره‌ به‌ڵام
که‌مه‌ زه‌وقی ئه‌ده‌بی و بیری وڵات و ئه‌مه‌لیش

ئاخ له‌ بۆ چه‌ک بگوڕێنێ له‌ ده‌ره‌ و دۆڵ و چیا!
چه‌ک و پێنووسی ده‌وێ ئه‌م گه‌له‌ ڕاماڵێ هه‌لیش!

ڕێزی سه‌ربه‌ستی ده‌زانێ گه‌له‌که‌م،داخ و به‌ڵام
هه‌ر سیا به‌خته‌ ده‌ڵێی کورده‌ له‌ ڕۆژی ئه‌زه‌لیش